केन्द्रीय विधि अर न्याय मंत्री किरेन रिजिजू कह्यो है कै सरकार अदालतां मांय सुबीता बधावण सारू लगातार काम कर रही है।

केन्द्रीय विधि अर न्याय मंत्री किरेन रिजिजू कह्यो है कै सरकार अदालतां मांय सुबीता बधावण सारू लगातार काम कर रही है। वे सगळी अदालतां मांय नुवी तकनीक काम लेवण माथै जोर दीनो। रिजिजू थावर ने उदयपुर मांय यूनियन ऑफ इंडिया काउंसल रा पश्चिम क्षेत्र रा केंद्र सरकार रा वकीलां रा दो दिन रा सम्मेलण रा उद्घाटन रै मौके बोल रह्या हा। वे कह्यो के देश री सगळी हाई-कोर्टां मांय एडिशनल सॉलिसिटर जनरल री नियुक्ति माथै विचार कर्यो जा रह्यो है। मंत्री रिजिजू कह्यो कै देश सारू स्वतंत्र न्यायपालिका जरूरी है। वे अदालतां रा न्यारा-न्यारा फैसलां माथै सोशल मीडिया रे जरिये करी जावण वाळी टिप्पणियां माथै चिंता जताई अर ऐडो करण वाळां रे खिलाफ कार्रवाई री जरूरत बतायी। ईं सम्मेलण मांय राजस्थान समेत गुजरात, महाराष्ट्र, गोवा अर मध्यप्रदेश रा केंद्र सरकार रा तीन सौ ऊं बत्ता वकील, न्यारी-न्यारी एजंेसिंया अर महकमा रा सरकारी वकील शिरकत कर रह्या है। ईं मौके सुप्रीम कोर्ट रा जज न्यायमूर्ति अजय रस्तोगी, केंद्रीय विधि अर न्याय राज्यमंत्री प्रो. एस.पी. बघेल अर राजस्थान हाईकोर्ट रा कार्यवाहक मुख्य न्यायाधीश जस्टिस एम.एम. श्रीवास्तव समेत न्यारा-न्यारा हाईकोर्ट रा जज ई मौजूद हा।